web 2.0

امریکہ نال لڑ بیٹھے آں

Hamid Ateeq

امریکہ نال لڑ بیٹھے آں

پوچھل شیر دی پھڑ بیٹھے آں

گدڑ چوکیدار بٹھا کے

باندر لیڈر کر بیٹھے آں


ریت دے اندر منہ سر دے کے

وانگ شتر ککڑ بیٹھے آں

انڈیا اتے چڑھدے چڈھدے

اپنی چھاتی چڑھ بیٹھے آں

ملاں پچھے جنت لبھدے

گھر وچ دوزخ بھر بیٹھے آں

پاکستان ترقی ہو گئی

خورے کیہ کچھ کر بیٹھے آں

دیوا بال بنیرے اتے

ہتھ وچ پکھا پھڑ، بیٹھے آں

ایٹم بم دھماکہ کر کے

ہر تھاں، نک، رگڑ بیٹھے آں

 


Tags:

Add comment